حين تكذب الأشجار! أو في تكريم السيدين وغارات الأنتينوف!

 

فجاة رأينا من مخائبنا شجرا يعبر فوق نهر السراب! هل سوف تتحقق إحدى إمنياتي الليلية؟ كنت طوال أيام أتمنى أن يقع بصري على أشجار في المدى الغارق في سراب ضوء النجوم. قلت للسائر بجواري دون حتى أن اتبين هويته: الاشجار لا تكذب!، قال السائر بجانبي دون أن يرفع وجهه: الأشجار لا تكذب لأنها لا تتكلم.
لكنني كنت مصرا على إنحيازي الشجري: الأشجار لا تكذب لكن هذا الجبل يخدعنا، كلما إقتربنا منه يغرينا أكثر بأن يسير بضع خطوات نحونا، لكن ما أن تشرق الشمس ونخلد نحن الى مخابئنا حتى يواصل هو رحلته بعيدا، كأنه يسير عكسنا، يتوقف في الظلام ويسير في النهار!

قلت لشيخ النور: الرئيس كرّم السيدين! بمناسبة عيد الاستقلال!
قال شيخ النور: وينه الاستقلال! ووينه العيد! ووينه البلد ذاته؟ البلد استقلت من الانجليز واستعمروها طلاّب السلطة. هسع أها دة بيقول امريكا وروسيا دنا عذابها. ومافي زول اتعذب غيرنا. دفعنا تكلفة الانقلاب كامل، دفعنا تمن الرصاص الكتلونا بيه. دفعنا تكاليف السجون السجننونا فيها . ومرتبات الناس الجوعتنا وحرمتنا من الدواء وحرمت اولادنا من التعليم. الانجليزي كان عدو، كان مستعمر، لكن راعى مصالح الناس. المشكلة في البيقول ليك انا وطني ويعرضك مع واطاتك للبيع، وبالتقسيط المريح كمان!.
قلت لشيخ النور: لكن عموما السيدين قبلوا التكريم! وشكروا الريس و..
قاطعني شيخ النور بضحكة عسكرية حاسمة قبل أن يقول: معقول زول يقلبني ويجي يكرّمني! دي يفهموها كيف؟ زول يقلع منك بلد كاملة ويديك شهادة! وكمان تمسكها! ويمكن يمشي يعلقها في الديوان ويوريها الضيوف! يقول ليهم شوفوا الزول القلع مني الحكم دة كريم كيف، جابني من دون الناس وكرّمني! زول قسّم البلد، حكمها غصب واتسبب فى موت ملايين الناس في حروب ما عندها معنى. بعد دة لو أنا زول بحترم نفسي وتاريخي، انا كنت حاكم شرعي الناس انتخبتني، كيف اقبل تكريم من زول خرق القانون والدستور؟ زول الدنيا كلها شايفاه مجرم حرب! واريته كان كتل ليه عدو، دة كتل شعبه! الشعب الحلف على كتاب الله يراعي مصالحه، اذا انا عندي تاريخ مشرف فعلا ما بقبل كلام زي دة، وكت اقبل حتى لو عندي تاريخ معناها الزول الكرمني دة افضل من تاريخي دة كله! وكت يكرمني مجرم حرب معناها أنا أبقى شنو يعني؟ بنط البيوت بالليل؟

قلت الزول دة خلاص لغى التمكين، رفد الجماعة الكبار، الجابوه للحكم! وجاب ناس الجيش. تاني زول ما عنده مؤهل غير دقينته زي زمان ما بيلقى شغل!
ضحك شيخ النور وقال: وانت صدقت! زول جة بكضبة، والكضب غيرو اسمه سموه أخبار، زي ما المجاعة بقت فجوة والكوليرا بقت اسهال مائي! السرقة ورفد الكفاءات وتعيين الحرامية بقى اسمها تمكين، وكتل الناس الابرياء بقى جهاد.وناس البلد بقو خونة وطابور، زول خرّب الخدمة المدنية الورثناها من الانجليز، كل شئ كان ماشي زي الساعة. بلد كاملة كان حاكمها مفتش واحد، هسع والي ومجلس وزراء وكل وزير بوزارته وموظفينه، ومجلس شعب ومحافظين وضباط اداريين ومحليات ولجان شعبية ومجالس مدن، ولجان فرعية ومنبثقة. وتعال شوف كنا وين وكت البلد دي كلها كان حاكمها محافظ واحد وبين زمن الجيش القاعد فوق راسنا دة، ندفع مرتباتهم وكل واحد فيهم داير يورينا انه احسن مننا وانّ كتّر خيره ان هو قبل يتنازل ويجي يحكم ناس رمم حاسدين زينا! الناس المؤهلين البلد دفعت فيهم دم قلبها شردوهم، وجابوا ناس الولاء على حساب الكفاءة. والنتيجة شنو؟ دمار في كل شئ. حتتوقع ايه من زول بليد غير مؤهل، جابوه المنصب عشان بس عنده دقن طويلة. حتى الدين نفسه، بيحرم انك تجيب زول غير كفء لوظيفة عامة بتمس حياة الناس ومستقبل اولادها. والنتيجة اهي لا مستقبل لا بلد ذاته! الكيزان عارفنها ما دوامة، عشان كدة ما ضيعوا وكت في دين وكرم اخلاق. سرقوا البلد خلوها جنازة وبعد داك قالوا لغينا التمكين! بعد ما رقدت وعدمت نفاخ النار! دارين يعملوا فوقنا زي عمايل عمك الخزين، إتسلبط في عجل شارد قال حقه، وكت ظهر سيد العجل بعد فترة، الخزين حلف اسم قال العجل حقه، الزول مسكين ما بتاع مشاكل استعوض الله وخلاه ليه، وكت العجل مرض وقرّب يموت، رسل لي صاحبه قال ليه خلاص تعال سوقه! كويس برضه ان ما عمل زي زمان وكت تمرض عنده بهيمة ويعرفها دايرة تموت، كان يضبحها ويفرّق على كل بيت كوم لحم ويجي يستلم القروش! 
قلت ذكرتني بقصة ناس حاسدين دي راجل كبير مرة زارنا في المدرسة جايي من الخرطوم، قلنا ليه الناس هناك كيف واحوالها كيف. قال لينا الناس هناك نصها حرامية والنص التاني حاسدنهم!
ضحك شيخ النور وقال: شكيناهم على الله. كيف ما نبقى حاسدين، شالو مننا كل شئ. باعو بلدنا قدام عينا، دمروا حتى أخلاقنا . زمن الاستعمار كان بجي عامل ناموس يحوم في الحلاّل كلها، يرش مبيد البعوض ويفتش لو لقى زول مخزّن موية ممكن توّلد باعوض، يجففها ويغرّم صاحبها. هسع أساسا مافي دولة عشان تفكر في مصلحة مواطن. الملاريا هلكت الناس، وعلاج مافي. ولو في علاج مكلّف والناس ما عندها إمكانية. وأكيد مسئولين اليومين ديل بيقولو: وينه المواطن ذاته النحارب ليه باعوض! ناس استبدت لغاية بقت في الدنيا ما شايفة زول غيرها. تقول بيعلموهم ان الزول الما معانا دة، ما زول! العدو المستعمر، كان على الأقل بيشوفنا واحد، ما بيفرزنا بشعر اللحية! كان مهتم بصحة المواطن وحياته، الوطني المستعمر بيهتم بموت المواطن، القروش الكانت بتمشي زمان عشان تكافح الباعوض وتعالج الملاريا وتعلّم الناس وتطور زراعة القطن، بتمشي هسع لشراء السلاح، يشتروا بيها الانتينوف، يملوها براميل بارود، عشان لو اتكلمنا وقلنا البغلة في الابريق، ينزلوها فوق رؤوسنا! رؤوس الكفرة والعملاء والمارقين، اللي هم نحن! 
سرحت بنظري في المدى، كنا نجلس فوق حصير السعف في الساحة الكبيرة في القرية، ونتكئ على جدار المسيد، كانت رياح الشتاء الباردة بدأت تهب محملة بالغبار. لكن الجو كان لا يزال أقرب الى الحر خصوصا في ساعات النهار. تبدو أشباح بوابات البيوت المطلة على الساحة مثل قطيع جمال ضخمة تسابق القمر. 
صمت شيخ النور، لا أسمع منه سوى صوت حبات المسبحة الرتيبة التي يسحبها بصباعه، بدا لي وكأنه هو من يقود الصمت الذي بدأ يغزو كل شئ. ساد الصمت في القرية. إختفى كل شئ يدل على وجود حياة في العالم. تلاشت حتى أصوات الكلاب الضالة وإختفى نهيق الحمير، شعرت ببرد جاف يتسلل الى قاع عظامي رغم أنني كنت ألف جسدي بشال ضخم من الصوف، لم إعرف إن كان بردا أو شعورا خارقا بالخوف، قلت لشيخ النور: يلا ندخل المسيد، الجو أصبح باردا! لكنه بدلا من أن يرد، إرتفع صوت غطيطه، لوهلة بدا لي صوت شخيره، مثل هدير صوت طائرة تخترق جدران الصمت، جدران الشتاء. شعرت كأن الصوت يوقظني من نوم عميق، نوم يغرق العالم كله، الناس والحيوانات، الأشجار والرمال. حتى القمر، كأن الهدير الذي سمعته يدوّي في السماء لم يكن سوى شخير القمر النائم في صحراء فضائه.


كنا موزعين في مخائبنا داخل الرمال، حين رأيت الشجر يسير من أمامنا في نهر السراب من على البعد. 
قلت بصوت مرتفع طغى عليه الرعب: أني أرى شجرا يسير!
إرتفعت عدة وجوه تنظر الى الاتجاه الذي أشرت إليه. نادى الحكيم المسن الذي يرافقنا: أدفنوا أطفالكم وأنفسكم جيدا في الرمال، نظر الى السماء الخالية ثم قال: إنها الانتينوف!
لم يكد يكمل جملته حتى سمعنا صوت هدير غريب. كأنه شخير العالم الغارق في سبات الضحى، يمزّق صمت االحياة في الصحراء.

حين دخلنا الغابة

حين دخلنا الغابة!

ليلة الجمعة إستيقظنا على صوت المؤذن، كان صوته غريبا وساحرا كأنه قادم من عالم آخر، بدأنا ننظر من حولنا في الضوء الخافت، كأننا نعيد التعرف الى العالم الجديد الذي كان يولد أمام أعيننا في ضوء القمر.

قال أحدنا: هل لاحظتم شيئا؟
قلت نعم، هذا صوت عبد الجبّار المؤذن، ثم قلت مترددا: لكنه مات منذ خمس سنوات!
رد الصوت: لا أقصد هذا، انظروا الى تلك الغابة!
لم ننظر الى الغابة، بل الى المكان الذي أشار إليه، لم نر شيئا في البداية، لكننا بقينا ننظر على كل حال في نفس المكان، فبدأت تتضح بعد قليل معالم أشجار كثيفة في نفس المكان الذي عبرنا فوقه بالأمس ولم يكن سوى صحراء جرداء لا ينبت فيها شئ. نذكر ذلك جيدا لأننا كنا جوعى، بحثنا عن شجرة طندب نجد فيها بعض الثمار فلم نجد شيئا، حتى انني علقت قائلا: يا له من قفر عجيب لا ينبت فيه ولا حتى الطندب!

قمت بتحريك حجري الى الأمام وقلت لشيخ النور: الجماعة شايفهم عملوا تغييرات، شالوا ناس وجابوا ناس!
دفع شيخ النور حجره الأحمر وقال بفتور: الشغل زي السيجة حقتنا دي، المشكلة ما في الحجارة، المشكلة في الراس واليد البتحرك الحجارة!
قلت: القروش راحت، زمان لقوا قروش البترول دي ووزعوها على ناسهم، كانت بتكفي الجميع، هسع الحالة وقفت والشارع منتظر ليه شرارة عشان يولع!

قال شيخ النور: الراس الكبير الظاهر قنع من الشغلة داير ليه ناس ثقة ما يسلموه الخواجات يحاكموه!
قلت: الضمان شنو طيب الزول الثقة دة هو ذاته يستمر في الحكم، مش يمكن يحصل اي شئ ويبقى زولنا مكشوف في اي وضع جديد ممكن يسلموه!
قال شيخ النور: لأ هو ما حيسلم للخليفة الا لو ضمن ليه وضع، يمكن يمشي لي حتة يضمن فيها مافي زول يسلمه، الزول دة ارتكب جرائم كبيرة ومحتاج يمشي يجاور في الحرم عشان يمرق الذنوب دي كلها. ما سمعت قصة العربي الشاف المهدي يبكي في الصلاة قام سأل رفيقه قال ليه الزول دة مالو يبكي!

رفيقه قال ليه: الزول دة لملم العربان والخلايق من هون وهون وساطها وجاطها وغير ربك تب ما في زول يعدلها تاني! لو المهدي كان بيبكي في الصلاة مفروض دة يبكي ليل ونهار وبعد دة الدم السفكه حيطارده ليوم القيامة!
قلت: ما اظن يخليها بالساهل الا يلقى ضمانات قوية، إن قضية المحكمة انتهت.
حرك شيخ النور حجره بعد فترة تفكير وقال: الزول دة فهم من هبة الشارع الأخيرة ان الزمن بقى ما في صالحه، والشارع دة هو ما عنده ليه حاجة تاني، الناس جاعت وتعبت والقروش مرقت من البلد، مرقوها جماعته الحرامية. ولو الشارع دة تاني قام مافي شئ بيقدر يوقفه. الناس اصلا ميتة ميتة، والرصاص ما بيكتل زول ميت!.
قلت: هم بيقصدوا ينشروا اخبار فرقهم الخاصة واستعمال رصاص قاتل ينفجر داخل الجسم واغتصاب البنات، عشان الناس تخاف ما تمرق الشارع.
قال شيخ النور: الموت واحد. وهسع الموت بقى في كل مكان، الناس جعانة وتعبانة قاعد يضربهم بالطيارات، العلاج بالقروش، والناس بسوء التغذية كلها عيانة. يبقى احسن لي امرق الشارع على الاقل يمكن اولادي يلقوا نظام محترم يحترم بني آدم ويديه قيمته. بدل ديل نحن والكلاب عندهم واحد!

إقترح أحدنا أن نذهب الى الغابة!
قال: سنجد هناك شيئا نتغذى به، صمت قليلا ثم قال ضاحكا، وربما نجد سلاحا نحارب به من أجل حريتنا!
توقفنا وقد ألجمتنا الدهشة، بدا لنا كأن ذلك الصوت الصادر عن أحد رفاقنا، كان يصدر في الواقع من كل واحد منا! حتى أنني تحسست حنجرتي لأتأكد أنني لم أكن صاحب الصوت الذي كان يتكلم في تلك اللحظة.
وجدنا أنفسنا نتوغل داخل الغابة!
مجرد أن وطئت أقدامنا ارض الغابة حتى سمعنا أصوات دقات طبول مكتومة! توقفنا، لقد سمعنا نفس دقات الطبول هذه في عوالم اخرى! عوالم أخرى يستحيل حتى وصفها، كانت أبواب الاشجار الكثيفة تنفتح من أمامنا وتنغلق من خلفنا.

قلت: واحد من الحرامية الكبار قال الانقاذ صفّرت العدّاد وبدت جديدة من الأول!
صمت شيخ النور حتى ينهي جولة السيجة، وضع الحجر الأخير وقال: كضابين، حتى وكت يضربوا الأمثال ما عندهم غير أمثال اللف والدوران. تصفير العداد بتاع العربات بيعملو بعض الناس عشان يوهموا المشتري ان العربية جديدة. بعدين هم بدل يرجعوا الصفر ويجونا سعرانين من جديد، اخير يقعدوا كدة على الاقل بعضهم شبعوا شوية بالنهب، لغاية ما يتحلوا من رقبتنا!
قلت: ذاكرة بلدنا بيتعاملوا معاها زي السبورة، يكتبوا فيها وبعدين يمسحوها ويكتبوا من جديد!

واصل شيخ النور حديثه بعد ان وضع السعوط في فمه ونفض الباقي من يديه : كلما يكتلوا الناس او يجوعوهم يحاولوا يوهموا الناس ان الفترة الصعبة انتهت بناسها، يحاول يخلو الناس تنسى عمايلهم السودة ، تغيير الأسامي والوجوه دة شغلهم، حتى حزبهم، مافي اسم في الدنيا ما جربوه. عشان يغسلوا سيرته من جرائم ومصائب الفترة الفاتت، لكن الناس وعت، الناس اللعبوا بيها كتير دي صحت، وفهمت اللف والدوران. الناس كان عندها اعتقاد قديم ان الحكومة دى جهة صالحة، ما بتضر الناس، حتى لو استخدت القوة احيانا دة عشان تحمى الناس، لكن الناس كلها فهمت هسع ان دي ما حكومة. دي عصابة سرقت البلد بالليل. ودايرين ينهبوا ويحكموا الناس. ومستعدين يعملوا اي شئ عشان يقعدوا في الكرسي لأن يوم يفارقوا الكرسي حيكون يوم صعب عليهم بالجرائم العملوها.

إنتبهت على صوت شخير، كان شيخ النور لا يزال يحمل حجر السيجة في يده، وقد إتكأ على جدار المسيد وإستغرق في النوم، أرحت ظهرى على حصير السعف، فرأيت القمر يطل وحيدا من خلف أشجار النخيل، رأيت في وجهه ما يشبه مركبا شراعيا يبحر الى الأبد. وسمعت ما يشبه دقات طبول بعيدة، كانت كأنها ترافق القمر منذ أزمنة خسوف غابرة.

الوفاء لدماء الشهداء يحتّم إستمرارية الثورة

شباب في عمر الزهور قصفت أعمارهم آلة القتل الإنقاذية. بعضهم لم يكن قد جاء الى الحياة بعد حين دقت مارشات إنقلاب الموت والدمار. حين جاء الربّاطة الى الحكم، كان أطفال السودان يجدون الحد الأدنى من الرعاية الذي تفرضه القوانين والأعراف في الدول التي تحترم مواطنيها. فالدولة لم تنشأ عبثا بل لتكون في خدمة المواطن وهو الأصل. جاءت دولة الربّاطة المتأسلمة بمفهوم جديد ما أنزل الله به من سلطان: المواطن في خدمة الدولة! تطارده في رزقه ومعاشه بل وحتى في روحه، ترسله ليقاتل في حروبها العبثية التي لم تستهدف يوما وحدة التراب بل تقسيمه.

حين جاءت الإنقاذ لتنقذ الناس من الحياة، كان أطفال السودان يجدون الرعاية ويدرسون في المدارس مجانا، ويدخلون جامعة الخرطوم مجانا، فكسبت بلادنا عقولا أسهمت في رحلة التطور قبل أن تتلقفها المهاجر في سنوات تيه دولة الرباطة. كانت الدولة فقيرة ومواردها محدودة، لكنها لم تكن أبدا دولة سماسرة. كانت توجه جل إهتمامها نحو المشروعات الزراعية التي قام عليها إقتصاد هذا البلد منذ القدم. كان كل شئ يسير ببطء لكنه يسير الى الأمام وكان مجتمعنا يتعافى أيضا ببطء من مخلفات القبيلة والجهة والطائفة .ويسير بفضل وعي الأجيال الجديدة نحو الإنعتاق من قيودها الى فضاء المواطنة الرحب ودولة القانون.

لكن الربّاطة الذين لا تنتعش أوهامهم الا في الظلام، وثبوا الى الحكم بالخديعة، وسعوا منذ اللحظة الأولى لتدمير كل شئ. فأعادونا الى ما وراء الصفر، الى عقلية القبيلة وأشرعوا سيوفهم في مواجهة كل تيار للوعي. وبدلا من مؤسسات المجتمع المدني الحديثة التي سعوا الى تحطيمها، والتي تحمي حقوق المواطن وتسهم في توعيته، أعادونا الى حضن القبيلة. لم يكن لهم من هم منذ لحظة مجيئهم المشئوم سوى أن يحافظوا على الكرسي حتى وإن ذهب وطننا الى الجحيم، وتفرقنا أيدي سبأ. وحين تنامت موارد الدولة لم يوجهوا المال لتنمية العقول وخدمة الأجيال الجديدة التي ستحمل أمانة الوطن. وجهوا كل مورد الى شراء البنادق التي يوجهونها الى صدورنا، وإستشمروا بقية المال في حياتهم الدنيا، الدنيئة.

الشهيد هزاع ورفاقه لم تقدم لهم الانقاذ شيئا ، لا مؤسسات تعليمية محترمة ولا خدمات صحية وعلاجية. هؤلاء الشباب الواعد الذين هم عماد المستقبل وعماد الدول المحترمة التي تمضي في مسيرة تطورها بفضل عقول وسواعد أبنائها. لم تقدم لهم حكومة الربّاطة سوى الإهمال و الموت.

دماء هؤلاء الشهداء تفرض علينا أن نواصل المسيرة حتى نقتلع الربّاطة من أرض السودان، لنعيد شعلة الأمل التي إنطفأت، الى أجيالنا والى وطننا.

الجراد في زمن الكيزان!

بدأ موسم الزراعة الشتوي، ورغم أن الجو كان لا يزال حارا، لكن عددا من المزارعين جازفوا بالبدء في الزراعة رغم الخوف من آثار سلبية لتأخر البرد.

كان حاج النور جالسا متكئا على حائط المسيد القصير، وفي مواجهته يجلس حاج سعيد، فيما وقف صلاح الجاز وأستاذ حسين المدرس في المدرسة الثانوية يتحدثان في الخارج. كان استاذ حسين يبدو متعجلا لكن صلاح الجاز أقنعه ليصلي المغرب ويبقى معهم لبعض الوقت.

قال استاذ حسين: ناس اللجنة الشعبية قالو الجاز حيجي خلال أيام، يا رب في ناس حتزرع السنة دي، الشباب كلهم في الدهب!

رد حاج سعيد: مجبورين نحن العجائز نزرع، لو بنقدر نمشي الدهب ما كان فضل زول في الحلة دي!.

قال شيخ النور: موسم جديد بنفس المشاكل القديمة. لا جاز لا تمويل، وكمان مافي برد. الاولاد الشباب طلعوا مظاهرات قعدنا نتفرج فيهم والكيزان الناقصين يضربوهم بالرصاص. أولاد صغار يضربوهم بالرصاص في صدورهم عشان يكتلوهم، شباب ياهم راسمال البلد دي بعد الكيزان دمروا كل شئ، قسموا البلد وخربوا المشاريع الزراعية، ونحن ساكتين تقول الكتلوهم ديل ما اولادنا ولا مستقبلنا ومستقبل بلدنا. الحصل علينا شنو يا اخوان؟ و البيحلنا من الناس دي شنو؟

قال حاج سعيد: يحلنا الحل بلة!

قال شيخ النور: والله بلة ذاته لو جة في زمن الكيزان دة ما كان لقى البيحلو ! 

ضحك استاذ حسين من حكاية بلة وقال: هم يفرحوا وكت يلقوا الناس يئست. هم عندهم ميزانية عشان يخلو الناس تيأس. المظاهرات دي ضربوها ضرب الخوف. الزول الخايف وكت يضربك تاني ما تقدر تقوم. لكن في النهاية هو بيكشف نفسه انه ضعيف و خايف، ونهايته مسألة وكت!.

علّق شيخ النور: والفايدة شنو اذا كنا نحن ذاتنا أضعف من الضعيف دة، اكتر من خمس وعشرين سنة يضرب فوقنا زول ناقص، حتى لو هو بقى هسع جنازة، نحن برضو ميتين وما قادرين نرفع رقبتنا عشان ندفن الجنازة الاسمها الانقاذ دي!

دخل سليمان الأعرج في تلك اللحظة، قبل أن يجلس جيدا على الأرض قال:

(السيدين) كان فرصتهم يكفروا شوية من اخطاءهم ويقيفوا مع الشارع لكن كالعادة فوتوا الفرص، لأن الناس ديل شايفين نفسهم سلطة في الحكم ولا برة ما فارق معاهم. لكن هم ما عارفين حاجة الناس وعت. والاجيال الجديدة دي ما بتعرف سيدي. دة جيل انترنت ، البديل بيطلع منه من معاناة الشارع، من الناس الشايفة اهلها بتعاني. الطائفية دي خلاص زمنها راح لو عندهم فهم للدنيا الاتغيرت، ودايرين يكسبو شوية زمن، مفروض يقدمو ناس كويسين ، قصة القداسة دي تاني ما بتأكل عيش!.

وافقه استاذ حسين: كلامك صحيح البديل حيجي من رحم حواء السودانية، النظام واحد من أهم اساليبه لتيئيس الناس من التغيير، الكلام عن البديل، يقولو اذا نحن مشينا حيجيكم ود المهدى والميرغني، وديل ناس فشلوا وأدمنوا الفشل اخير ليكم نحن. لكن الشباب الجديد الطلع في سبتمبر، شباب قلبه على بلده وعلى اهله، شباب واعي ومتابع الحاصل في الدنيا كلها وصعب أي زول يخدعه. وديل هم البديل. وكت قامت الثورات في بلاد كثيرة الناس ما فكرت في البديل، لأنها وعت وعرفت ان البديل نظام وقانون مش أشخاص. لو في قانون بيساوي الناس ويحاسب البيغلط ما مهم الصندوق بعداك يجيب منو. بعدين سنة الحياة ان الوجوه القديمة دي ما حتقدر تتماشى مع زمن جديد بأفكار جديدة. وفي النهاية البديل لا يمكن الناس تخاف منه لأن الناس عرفت أن النظام دة يستحيل يكون في أسوأ منه في الدنيا كلها. 

قال حاج النور: الحزب الاتحادي دة زمان كان عنده وجود في المنطقة دي، لكن وسط الأجيال الجديدة بقى ما عنده وجود عشان كدة في اخر انتخابات قبل انقلاب الانقاذ جوا الكيزان غشوا الناس وقالو نحن ناس دين وعاوزين نطبق الشريعة. الناس مساكين بيفتكروا اي زول يتكلم في الدين دة معناه زول نضيف ما حيسرق حق الناس او يظلمهم، الظلم الظلمونا الكيزان والسرقة السرقوها مافي زول في الدنيا سبقهم عليها. لكن حتى لو قلنا الكيزان انكشفوا وانتهوا الاتحادي تاني ما حيرجع. الا اذا شباب الحزب مشوا ورا على محمود حسنين على الاقل هو زول عنده مبدأ وما اتنازل ابدا. اما ناس حزب الأمة اخير الإمام دة يتفرغ للامامة ويدي الاجيال الجديدة فرصة، اولاده كمان اتلوثوا مع الكيزان، البنات أحسن على الاقل بناته ما اتنازلن ووقفن مواقف قوية، حتى واحدة كسروا ليها الكيزان يدها.

قال استاذ حسين: الطائفية ما عندها مستقبل، الاجيال الجديدة منفتحة على العالم بفضل الانترنت، الناس في البلدان الحكم الديمقراطي فيها ثابت وقديم، معظمها ما عندها ولاء لحزب، بتشوف برنامج الحزب البيحقق مصالحها وطموحاتها وتصوت ليه، يعني ممكن الزول يصوت ليك المرة دي وعادي المرة الجاية يصوت لي حزب تاني، والناخب بيحاسبك بالصندوق، لو ما نفذت البرنامج النزلت بيه ما بيديك صوته تاني. 

قال حاج سعيد: تاني ناس عاش ابو هاشم ولا نصادق الا الصادق ديل ما حياكلوا عيش يعني!

بعد الصلاة إستأذن استاذ حسين خارجا، رغم محاولات حاج النور وحاج سعيد معه ليبقى للعشاء.

نظر حاج النور ناحية سليمان الاعرج وقال: صاحبك وين يومين ما ظاهر؟ ولا يكون مشى الخرطوم تاني يجتمع بالريس!

ضحك صلاح الجاز وقال: يكون صادر ليه برميل عرقي لو ما خلص ما حيظهر تاني!

قال حاج سعيد: أريت كان يجيب ناس الشرطة الشعبية بتاعنو القاعدين ساكت ديل يساعدني نبني حائط البيت الوقع بسبب المطر!

علّق سليمان: قالو الوالي بتاع الخرطوم منع الناس تبني الجالوص!

الوالي الهي ما يلقى الوالي، نحن بلحيل بنحب الجالوص، خلي يدينا الاسمنت نبني بيه، شركاتهم قالو محتكرة تجارة الاسمنت يكون لقوها فرصة يبيعوا للناس بالقوة!

قال شيخ النور: جراد وغلاء وجوع، وكمان يضربوا اولادنا بالرصاص في صدورهم ورؤوسهم!.

قال سليمان الاعرج: أمس شفت لي حلم عجيب، قال ناس اللجنة الشعبية مجتمعين في حوش المدرسة عشان يشوفو طريقة يحاربوا الجراد، والجراد واقف فوق سور المدرسة منتظر نتيجة الاجتماع! والاجتماع طوّل، الجماعة يتناقشوا في الموضوع يمكن تلاتة يوم ولا اسبوع ما عارف! والجراد منتظر، واحد يقول نحرق البلد عشان نحرق الجراد! وواحد يقول نسمم عيش ونكبه للجراد، نط واحد قال ليهم لكن الحمير والبهائم يمكن تاكل العيش المسموم! رئيس اللجنة قال ليه ما مشكلة نكلم اي زول يربط حماره ويلم بهائمه! واحد قال طيب يا اخوان يمكن زول جعان ياكل من العيش! رئيس اللجنة قال ليه ما مشكلة يموت تلت ناس البلد عشان الباقين يعيشوا حياة كويسة وآمنة! واحد قال نجيب الفقرا يقروا للجراد! نط واحد قال ليه فقرا الزمن دة والله جرادة في الكف ما يطيروها! نط واحد قال نجيب الجن، الجن المسلم، أصلا زمان في زول اقترح قال عشان نحصّل العالم الإتقدم علينا الا نجيب الجن! يا زول وكت الكلام جرّ وأبى يخلص، الجراد زهج، وفجأة إنطلق على ناس اللجنة الشعبية ديل زي الفكوه بمدفع، وأبات دقون ديل جروا جري الوحوش! لامن فارقوا البلد بإتجاه الصحراء، أها بعد ما الجراد سكاهم وجروا لغاية مرقوا برة الحلة، جينا نحن شلة من ناس البلد في المحل عشان نسألهم عملو شنو في موضوع الجراد، ما لقينا شئ غير جبل من المراكيب خلوها الجماعة وكت الجراد سكاهم!

ضحك حاج سعيد وقال: اذا كدة أبشروا نبوءة المرحوم حاج حسين ان الكيزان حيجي عليهم يوم يخلوا مراكيبهم ويجروا، وكتها جة خلاص!

الشيطان يحمل بندقية

في المسيد كان سليمان الاعرج جالسا فوق برش الصلاة يتوضأ من إبريق الماء البلاستيك، أبريق الماء فقد لونه بسبب الزمن وتشققت حوافه، وأصبح يسرّب من الماء أكثر مما يحتفظ به. جواره كان فارس يرقد مضطجعا بملابسه الرسمية وبجانبه بندقية.

في تلك اللحظة دخل شيخ النور الى المسيد، لمح الزي الرسمي النائم فوق برش الصلاة وقال: ما شاء الله الليلة حنصلي في حراسة الحكومة! فارس كان يغطي وجهه بيده، لم يتحرك من مكانه أو ينظر الى حاج النور.  

ما تقوم يا ولد تستعد للصلاة والا خلاص عشان بقيت مؤتمر وطنى عفوك من الصلاة!

قال سليمان الأعرج: ولا يمكن عشان عنده بندقية بقى ما خايف ولا حتى من الله!

قال فارس دون أن يتحرك: أنا عندي رخصة!

ضحك شيخ النور وقال: رخصة رمضان عرفناها، غشيتنا قلت عندك الكلى، وانت زي الحصان، والا بعد بقيت شرطة شعبية سويت ليك رخصة كبيرة، شاملة العبادات كلها!

قال فارس: عندي ملاريا!

قال حاج سعيد الذي وصل في تلك اللحظة: ملاريا كيفن ما تجيك ، كل يوم سهران ليك في بلد، وحايم مطلوق وسط الحلال، المرة دي كاشفة شعرها والزول دة سكران والزول دة شرع في الزنا!.

نعمل شنو ما نحن لازم نسهر عشان انتو تنوموا بأمان!

ضحك شيخ النور وقال: اذا الرباطي الحرامي صاحي ، وحايم بسلاح كمان عينك يا تاجر،  حاميها حراميها. الأمان يجي من وين؟! وكت تكون انت ولا واحد من كيزانك جنبنا نحن صاحين بالنهار بنكون خايفين، خليك من الليل!

أعلن فارس بفخر سلطوي: الاسبوع الفات أولاد المدرسة الثانوية طلعوا مظاهرة، لو ما وقفنا ليهم دقيناهم دق الرخصة، كان دخلوا الحلة حرقوا ممتلكات الشعب!

ضحكوا جميعا لحكاية ممتلكات الشعب، وقال شيخ النور: وينها ممتلكات الشعب؟ شوية القصب الناشف ولا بيوت الجالوص المكسرة دي ولا مخازن العيش الفاضية الا من العنكبوت؟ والا الزرايب الما فيها غير نعجة عرجاء، يا حمار دراوي ضهره كله دبر، ممتلكات الشعب زمان جماعتك دقوا فيها الجرس. يا ريت لو كان عندنا ممتلكات يحرقوها!

قال سليمان الأعرج: بعدين قالو ممتلكات الشعب دي قاصدين بيها ممتلكات الكيزان، هم العندهم ممتلكات، قروش البترول سووها عمارات وطرمبات بنزين وشركات، ناس قريعتي راحت طلعوا من البترول بقد البرميل اقصد القفة!

قال حاج النور: حتى شوية الطرمبات القالو الناس حرقتها ، كضابين، فضوها من البنزين وحرقوها براهم عشان يلقوا سبب يضربوا الناس المساكين المرقت بالجوع والهملة، يضربوهم بالرصاص.

قال حاج سعيد: الناس بقت واعية وعرفت الكيزان ناس كضابين وحرامية، والدين دة رافعنه ساكت تجارة، عشان كدة تاني ما في زول بيصدقكم،

قال فارس: الحقيقة الاحتجاجات كانت قوية المرة دي، أنا فكرت استقيل من الحكومة! لكن قلت كدة نصبر شوية يمكن القصة دي تعدي ساكت!

ضحك شيخ النور وقال: إنت بقيت زي السيدين، كراع جوة وكراع برة! إستقالتك جاهزة مكتوبة، ترميها في آخر دقيقة قبل البيان الأول!

علّق سليمان: (السيدين) دايرين الأولاد يموتوا بعدين يتحركوا عشان يركبوا الموجة الجديدة! ولو الشباب فشلوا يكونوا هم ما خسروا حاجة! لو الشباب نجحوا يجوا هم حكّام ولو الشباب فشلوا، البركة في أولادهم المساعدين!

قال صلاح الجاز: والله مساعدين السرور، مساكين نحن عمرنا كله شغالين مساعدين، ما لقينا شئ بلا التعب، أرفع الصاجة، أحفر تحت اللستك، غيّر زيت اللوري. يا ربي هسع مساعدين الريس ديل شغلهم شنو؟

ضحك شيخ النور وقال: مافي فرق كتير، الريس برضه زي اللوري القديم، المكنة خفيفة، كلما يوحل، المساعدين لو شداد يمرقوا، بس الشغل في القصر نضيف شوية وما فيه تغيير زيت وكدة! الريس ذاته مسكين مشغول بموضوع السفر، وكت غلبه يمشي أي محل في الدنيا، مشى الحج! أهو قال منها حجة وزوغة، لو لقى ليه عقد عمل ماله ومال تعب الحكم، كلما يفصل ليه بلد، يقول يرتاح شوية، الجنبها تقوم، فتر مسكين، حتى رقيصه قلّ الزمن دة!

قال حاج سعيد: يا ربي تاني يرقص بعد الحج؟

علّق شيخ النور: ما أظن هو مشى يتوب من الرقيص! انا مستغرب بعد الشباب الكتلوهم ديل كلهم، كيف زول يكون عنده نفس يمشي الحج زي الما حصل أي شئ!

واصل فارس كلامه كأنه لم يستمع لكلام شيخ النور وحاج سعيد:

 الحقيقة أنا كتبت إستقالة، لكن عملت زي نظام السيدين، وكت لقيت الشارع هدا شوية قطّعتها!

ما كان تخليها يمكن تحتاج ليها قريب!

كتبت ليهم شنو؟

والله أنا فكرت أعمل إنقلاب، بدل الشرطة الشعبية دي لو كان ودوني دفاع شعبي، كان عملت إنقلاب أبيض!

قال حاج سعيد: أبيض ولا أحمر، المهم كنت داير تقول شنو للناس؟ أوع تقول جايي أنقذكم!

لالا، إنقاذ شنو، الناس عرفت خلاص، انا حأقول: من أجل الديمقراطية والثورة والتعددية والوحدة الوطنية!

يا زول دة كلام كبير، إنت ما بتقدر عليه!

بعدين بقول في البيان الاول ان البلد إتقسمت وإتدمرت، والناس إتفتنت ورقدت سلطة في بعضها، والجوع دخل البلد رغم ان بلدنا بلد غني، لكن بسبب السرقة والفساد والمحسوبية. اما السيد الريس فقد اضاع وقته ووقت امته في الرقيص والكلام وضرب الناس المساكين بالرصاص!

قال سليمان الأعرج: تراك حافظ بيان جماعتك الاول!.

رد فارس بسرعة: البيان دة ذاته ينفع للزول الداير يقلبهم اكتر مما كان يناسب انقلابهم!

ضحك شيخ النور وقال: شيخ حسين الله يرحمه كان دايما يشتم الكيزان، وكلما يلقى مداحين في المولد ولا الحولية يقول ما دام الكيزان حكمونا ديل كمان قريب حيحكمونا. قلنا ليه يا شيخ حسين بالك الكيزان القالو تاني ما يسلموها الا عيسى ديل حيتفكوا من الرقبة. كان راجل حكيم، قال أنا ما بحضر وكت يمشوا لكن صدقوني حيجي عليهم يوم، حيخلو مراكيبهم ويجروا!

كأن فارس خاف لذكر نبوءة الشيخ حسين ، صمت قليلا ثم أعلن: يا اخوانا لو حصل شئ، انتو عارفني زولكم، بعدين انا الوحيد المشيت وقفت ضد الناس ديل في الانتخابات، وكنت داير انزل ضدهم، وعملت برنامج التأصيل الأصلي، مش التأصيل المضروب بتاعهم، وحتى وكت غشوني وقالو حنعملك مدير ولا وزير، مرقت في النهاية بمنسق شرطة شعبية ودي ذاتها والله يا الاخوان ما قاعد اشتغل فيها ضد الناس المساكين.

قال حاج سعيد: انت مشكلتك لا ضد مسكين لا ضد حرامي!

لو داير تقدم السبت عشان بكرة بكرة وكت الشارع دة يطلع تاني مافي شئ بيقدر يوقفه، الشباب قتلوهم، اسرهم قالت ديل فداء للبلد دة. الناس تاني ما بتخاف، والتمن الغالي حيدفعوه الكيزان الكتلوا الناس ودمروا البلد ونهبوها.

لو داير تقدم السبت تستقيل هسع وتكشف للناس عمايل الناس ديل!

الاستقالة دي خلوها شوية يا اخوان، نحن لسة ما شفنا حاجة، والله بس كراعنا حارة وكت قربنا على الوزارة الشغلة اتقلبت، الناس دي صابرة على عمايل الكيزان ديل اكتر من عشرين سنة. الكيزان ياهم الكيزان، من يوم جوا سرقة وكتل، وكت هسع خلاص قرّبت تستوي والوزارة بقت خلاص شايفها بعيني، الناس صحوا من النوم، سحر الكيزان العاملنو للناس فجأة راح، والناس يادوب شافت انها مظلومة!

قال حاج النور: انت ما فوقك فايدة، خليك مع ناسك ديل. ياهم شبهك.

حضر في تلك اللحظة عبدالرحيم و محمد الحسن إمام المسجد، أقام سليمان الأعرج الصلاة. حين وقفوا في صف الصلاة، نظر فارس حواليه وتذكر قصة السبت والأحد، وقف بدون وضوء بجانب حاج سعيد في صف الصلاة الثاني، لكن حاج سعيد إبتعد منه.

قال فارس: ما تقرّب يا حاج وتضم الصف.

قال حاج سعيد: أقرّب منك إنت؟  ليه؟

عشان الشيطان ما يدخل بيناتنا!

شيطان! قال حاج سعيد مستغربا وفي شيطان غيرك وغير جماعتك الكيزان؟

إبتعد حاج سعيد مسافة اكبر تاركا فارس وحيدا وقال قبل أن يكبّر للصلاة:

شيطان وشايل بندقية كمان!.

رانيا مأمون أمام المحكمة بتهمة إثارة الشغب!

تمثل الاستاذة الروائية والقاصة رانيا مأمون صباح اليوم أمام المحكمة بتهمة إثارة الشغب!

بسبب مشاركتها في مظاهرة ضد السلطة غير الشرعية تعرّضت الاستاذة رانيا مأمون وشقيقها للتعذيب والاهانة من قبل ربّاطة جهاز الأمن السوداني سئ السمعة. لم يكتف الربّاطة بضربها هي وشقيقها دون رحمة، ولكن وجّهت لها تهديدات وشتائم بذيئة لا تصدر عن بشر أسوياء. أناس تحجرت قلوبهم وأفرغت عقولهم من كل المشاعر الانسانية والقيم السودانية الأصيلة. الانسان السوداني الذي جاء الرباطة لانقاذه كما يزعمون لا يساوي عندهم شيئا أكثر من ثمن طلقة رصاص يوجهونها الى صدره أو رأسه.

الربّاطة يراهنون على تجهيل الشعب السوداني بالواقع السئ الذي دفعت الانقاذ بلادهم إليه. يحاربون كل صاحب صوت أو ضمير حي، يغلقون الصحف ويطاردون أصحاب الأقلام النظيفة التي لم تتلوث بعطايا فسادهم. البلد الوحيد في العالم الذي يصدر فيه جهاز الأمن والمخابرات قرارات بوقف الصحافيين عن العمل خارج حدود القضاء! ! لا يوجد قضاء نزيه في العالم كله يمكنه إيقاف صحفي عن العمل، يمكنه أن يعاقبه حسب نصوص القانون إن تجاوز في عمله حدود حقوق الآخرين، مثله مثل أي مواطن مسئول آخر.

ويزعم النظام بكل صلف أنه توجد حريّات صحفية أكثر مما هي موجودة في بلدان الجوار! لا يكاد يمر يوم واحد دون أن نسمع بخبر إغلاق صحيفة أو مكتب قناة فضائية أو القبض على صحفي أو إيقاف صحفي عن العمل، بالأمس إعتقلوا صحفيا لمجرد انه تحدث في إتصال هاتفي مع إحدى القنوات الفضائية!، يا لهشاشة نظامهم! وضعفهم الذي عجزوا عن إخفائه!. حتى المواقع الالكترونية يطاردونها بخبراء التخريب وبكلابهم التي تسعى دون كلل لتغبيش الوعي وإثارة النعرات والتقليل المتعمد من أهمية النقد والحوار ، وصرف الناس عن مناقشة قضايا وطنهم المصيرية.

رانيا مأمون بإسهاماتها الكبيرة هي إحدى رموز الإستنارة التي نفخر بها في بلادنا، ولأن سدنة الظلام لا يرعبهم شئ سوى نور الوعي، يوجهون سهام حقدهم نحوها ونحو رفيقاتها . أمثال رانيا مأمون في كل مكان يحترم فيه الإنسان وتقدّر إسهاماته وإبداعاته تفرش لهم الزهور وتقام من أجلهم مهرجانات التكريم. بينما في بلادنا التي كانت موطنا للعزة والقيم النبيلة، يتم إضطهاد النساء والشباب، وضربهم من قبل أشباه رجال فقدوا النخوة والرجولة.

تضامننا الكامل مع الأستاذة الروائية رانيا مأمون والدكتورة سمر وكل نساء بلادنا.

ortoot@gmail.com

الصورة للاستاذة رانيا مع المترجم واستاذ الأدب العرب في جامعة بروكسل اكسافير لوفان في حوار حول احد اعمالها الأدبية ضمن فعاليات مؤتمر أدبي في بروكسل 2011.

حكومة الجريمة المنظمة والعزف على وتر العنصرية

في حوار منسوب لأسامة بن لادن بعد خروجه أو إخراجه من السودان، قال إن ما يحدث في السودان خليط من الدين والجريمة المنظمة!

بعد أن استنفدوا أغراضهم منه وشحنوه بأحقادهم التي ستنفجر في العالم، سعى النظام لمضايقته ليغادر بهدوء. من القصص التي تحكى عن تلك الفترة أنهم جاءوه يوما طالبين التمويل لمشروع جديد، ولأنه كان قد خبر ألاعيبهم، فقد طلب دراسة جدوى المشروع وطلب تحديد موعد نهائي للبدء في تنفيذه، أعطاهم المال، وحين أزف الموعد ولم يطرح المشروع المزعوم أية ثمار، سألهم عما جرى بشأنه، فأوضحوا أنهم تركوا ذلك المشروع لأنه يحتاج وقتا طويلا ولأنهم إكتشفوا أن عائده لن يكون مجزيا!

تساءل الرجل: وأين أموالي؟

كان ردهم: (قلنا نقلب بيها في السوق عشان قيمتها ما تضيع! اشترينا بها بضائع وقمنا بتخزينها).

وحتى يقوم (بتوصيل) الكذّاب (لحد الباب) سألهم عن نوعية البضاعة التي قاموا بشرائها وهل يمكنه تسلمها؟

أوضحوا له أن البضاعة التي إشتروها عبارة عن محاقن طبية بلاستيكية من النوع الذي يستخدم مرة واحدة.

وأن لا مانع أن يتسلمها ودفعوا له بمفاتيح تزن عدة كيلوغرامات هي مفاتيح المخازن التي ملئت بالمحاقن البلاستيكية التي تساوي عدة ملايين من الدولارات!

مجرد أن تسلّم المفاتيح حتى بدأت الزيارات تترى من الضرائب والجمارك وغيرها من مؤسسات الجباية الرسمية (وكلهم عاوزين حقهم)!

هل كان مخطئا حين تحدث عن الدين والجريمة المنظمة؟ الآن لم يعد هناك من دين، توجد جريمة منظمة .

حين إتجه د. خليل بجيشه نحو الخرطوم، كانوا يعرفون بخبر وصوله الوشيك ، بالطبع تراجع دور الجيش وأصبح كل شئ في يد جهاز الأمن. الذي لم يكن له من هم سوى النفخ في بوق العنصرية وإحياء الجهوية والقبيلة، كآخر حائط صد للنظام في مواجهة خصومه وهم كل أهل السودان بإستثناء منسوبي المؤتمر الوطني.

وجدوا في وصول جيش خليل الى الخرطوم سانحة لا تعوض لتحقيق أكبر قدر من الفتنة والشقاق بين أبناء الوطن. وبدلا من مواجهة الجيش خارج الخرطوم، تركوه يدخل العاصمة!

د. خليل كان واعيا لمخططات جماعته السابقة. فقد كان جزءا من تفكيرهم يوما. حرص أن يتجه جيشه الى أهدافه، وألا يضار أية مدني من دخول قواته الى العاصمة. فكسر للجماعة دش العنصرية في يدهم!

الآن يتكرر نفس السيناريو. رغم أن الأحداث تجاوزت موضوع العنصرية. فالنظام المذعور لم يتورع عن إطلاق الرصاص في رؤوس شباب المركز ، حين شعر بهم يهددون سلطته غير الشرعية. كأنه يفند بنفسه أكاذيبه التي ظلت أبواق إعلامه ترددها منذ سنوات ألا خطر على أهل المركز سوى الهامش وأنه هو من يحمي المركز من حقد الهامش.

هذا الحامي (الحرامي) لم يقدم لهذا المركز سوى ما يقتضيه عمل شركات الجريمة المنظمة التي يملكها النظام. تماما مثل الهامش سحب من المركز مجانية التعليم والعلاج وفرض عليه من الضرائب ما لو رآه الترك لبكوا دما على الاموال الزهيدة التي قاموا بتحصيلها من أهل السودان، و التي تجشموا بسببها عناء غزو هذا القطر الشاسع أرجائه !

الآن يتكرر نفس السيناريو، يفبرك النظام القصص والأفلام التي تضرب في وتر العنصرية وأوهام الاستهداف، والأيادي الخفية، يريد أن يضرب عدة عصافير بحجر واحد: يسئ للجبهة الثورية ويزيد أوار نار العنصرية التي أشعلها بين شعب السودان، و إرغام أهل المركز على الإصطفاف من خلفه بإعتباره حامي الأرض والعرض. يراهن على ضعف ذاكرة الناس، فالأرض لم يفرّط فيها غيره والأعراض ينتهكها سدنته. يقتلون الشباب رأسمال أهل السودان ، يسيئون ويضطهدون ويتحرشون بالنساء، يحرقون الممتلكات العامة ليوسعوا الشقة بين أبناء الوطن الواحد، وفق المصطلح الإستعماري: فرّق تسد!.

النظام لا يهمه أن تتفتت البلد أو تغرق في حروب أهلية، المهم أن يبقى في السلطة .

الامة والاتحادي الديمقراطي بترددهما وعدم حسم قيادتهما لمواقفهما تجاه النظام، لم يعودا جزءا من الحل القادم. إن مسألة إنتظار الشباب ليحسموا الوضع ثم التقدم من بعد ذلك، لم يعد مقبولا وسيخصم كثيرا من رصيد هذه الأحزاب، التي ستجد نفسها في خندق واحد مع النظام. هذه الأحزاب في حاجة لتطور نفسها وتتقدم بقيادات شابة، تخرج من رحم القواعد المخلصة لوطنها، التي تطأ في جمر المعاناة اليومية و تكابد الاستبداد والقهر، قيادات تواكب نبض الشارع المتوثب للحرية والعدالة ، والا فمصيرهذه الأحزاب مزبلة التاريخ.

ortoot@gmail.com